Bakı Ekspo Mərkəzində 15-ci "Caspian Agro" beynəlxalq kənd təsərrüfatı sərgisi və 27-ci "InterFood Azerbaijan" beynəlxalq qida sənayesi sərgisi keçirilib. “Azərsun Holdinq”in də iştirak etdiyi sərgiyə bir çox yerli və beynəlxalq şirkətlər qatılıb. Şirkətlər Qrupunun Müşahidə Şurasının sədri Abdolbari Gozal və İdarə heyətinin üzvi Əhməd Gozal “Azərsun Holdinq”in stendi ilə yaxından tanış olublar. 
Tədbirdə iştirak edən Azərbaycanın Baş naziri Əli Əsədov, İsrailin kənd təsərrüfatı və kənd rayonlarının inkişafı naziri Oded Forer, Türkiyənin kənd təsərrüfatı və meşə təsərrüfatı naziri Vahit Kirişçi, Türkiyənin Azərbaycandakı səfiri Cahit Bağcı, Rusiyanın Azərbaycandakı səfiri Mixail Boçarnikov, İsrailin Azərbaycandakı səfiri Corc Dik və digər rəsmi şəxslər də öz unikallığı ilə seçilən “Azərsun Holdinq” stendini ziyarət ediblər və onlara, nümayiş olunan məhsullar haqda ətraflı məlumat verilib.
Qeyd edək ki, "Caspian Agro" və "InterFood Azerbaijan" sərgilərində 24 ölkədən 450-yə yaxın şirkətin məhsulları nümayiş olunub. Sərginin ən çox ziyarətçi qəbul edən stendlərindən biri olan “Azərsun Holdinq” stendində tədbir boyu qonaqlara şirkətlər qrupuna məxsus qida və kənd təsərrüfatı məhsulları təqdim olunub və şirkət haqda müxtəlif videolar nümayiş etdirilib.