“Qarabağ” növbəti avrokubok oyununu keçirib. Komandamız Avropa Liqasının pley-off mərhələsində cavab matçına çıxıb. Qurban Qurbanovun yetirmələri evdə “Braqa"nı qəbul edib.

Qonaqlar ilk dəqiqələrdə fəallıq nümayiş etdirsələr də, “Qarabağ” müdafiədəki inamlı oyunu ilə rəqibə şans verməyib. Ardınca üstünlüyü ələ alan komandamız fasiləyədək topa daha çox nəzarət edib.

Səfərdə 4:2 hesabı ilə qələbə qazanan “Qarabağ” artıq ilk 45 dəqiqədə hesabı açmağa da yaxın olub. Elvin Cəfərquliyev, Leandro Andrade və Marko Yankoviçin zərbələrini rəqib qapıçı dəf edib. Hissənin sonlarında Olavio Juninyo topu rəqibdən alaraq Leandro Andradeni qapıçı ilə üz-üzə qoyub. Kabo-verdeli yarımmüdafiəçi bu imkandan yararlana bilməyib.

İkinci hissə qarşılıqlı hücumlarla başlayıb. Fasilədən az sonra Marko Veşoviç və Abdullah Zubir əlverişli imkanları qaçırıblar. Elvin Cəfərquliyevin qapı önünə ötürməsi isə dəqiq alınmayıb. Onun ikinci sarı vərəqəyə görə qırmızı almasından sonra rəqib say üstünlüyü qazanıb. Bundan yararlanan qonaqlar ərazi üstünlüyünə də yiyələnib. Müdafiə xətti və qapıçımız Andrey Lunyov “Braqa”nın önünü dəfələrlə kəssə də, Portuqaliya klubu matçın sonunadək 2 qol vura bilib.

Komandaların taleyinə əlavə vaxtda aydınlıq gəlib. Öncə Mateus Silva fərqi azaldıb, lakin rəqib penalti ilə üstünlüyünü iki topa çatdırıb. Uzatma dəqiqələrində qol vuran Nəriman Axundzadə komandamızı 1/8 finala aparan topun müəllifi olub və beləcə, matç 3:2 hesabı ilə "Qarabağ"ın xeyrinə sonlanıb.

Bununla da “Qarabağ” Azərbaycan futbol tarixinə 1/8 finala yüksələn ilk komanda kimi düşüb. Komandamızın rəqibi bu gün keçirilən püşkatma ilə "Bayer 04 Leverkusen" olub.

MEDİA

"Qarabağ" Fk Avropa Liqasının 1/8 Finalındadır